Somos Cabanas chama ao diálogo para evitar a moción de censura no Concello de Fene
A asemblea cidadá cabanesa ofrécese humildemente para mediar e parar o ascenso do PP á alcaldía de Fene
O que pase en Fene tamén lle afecta a Cabanas. Por este motivo, a candidatura cidadá de Cabanas lembra que as listas electorais promovidas ao abeiro do manifesto Somos Maioría teñen como obxectivo principal promover a participación dos veciños nos concellos e mudar os xeitos de facer política. Calquera das persoas que participaron nestas candidaturas non debe amparar actuacións que vaian en contra do espírito e principios que as inspiraron.
Neste momento a ninguén se lle pasa por alto que o acontecido en Cataluña ou Murcia ten como responsable un Partido Popular monolítico e contrario aos principios do diálogo e do respecto aos dereitos cívicos. Estes acontecementos deberían levar á reflexión de todos os concelleiros e concelleiras de Fene para valorar e atopar un punto de encontro e respecto que recupere o acordo de goberno. Os veciños de Fene merecen a solución das súas inquedanzas cunha nova oportunidade para o cambio.
Tal e como puido comprobar durante os últimos tempos, a candidatura de Cabanas detectou diferenzas entre as candidaturas de esquerda en Fene que se poderían resolver con vontade e asentando principios de respecto e escoita activa. E con este marco ofrécese con toda a humildade e respecto para mediar e evitar que o PP ocupe a alcaldía fenesa. Desexamos chegar a tempo.
Cabanas, 11 de outubro de 2017
A asemblea local de Somos Cabanas